“Vətən məndən başlayır!” DİA-da - FOTOLAR

26 dekabr 2019 12:33:22

“ZƏFƏR” Şəhid Ailələrinə Dəstək İctimai Birliyi universitetlərdə təhsil alan gənclər arasında yeni sosial layihəyə başlayır.

“Vətən məndən başlayır!” adlı sosial layihə 2019-2020-ci tədris ili ərzində Bakıda və regionlarda yerləşən bir çox universitetlərdə həyata keçiriləcəkdir. Layihə çərçivəsində yerinə yetiriləcək fəaliyyətlərin əsas məqsədi xüsusilə gənclər arasında vətənpərvərlik və dövlətçilik ideologiyalarının “Vətən məndən başlayır!” devizi altında təbliğ olunması, hər bir fərdə ümumi tərəqqi və dövlətçiliyimizin daimi olması naminə öz fəaliyyətlərində daha çalışqan, məqsədyönlü və əzmkar olmağı təşviq etməkdir.

Bu layihə çərçivəsində növbəti tədbir dekabr ayının 25-də Azərbaycan Respublikasının Prezidenti yanında Dövlət İdarəçilik akademiyasının tələbə və müəllim heyəti ilə birgə keçirilib.

Tədbirdə DİA-nın prorektoru Əlikram Abdullayev, “Zəfər” Şəhid Ailələrinə Dəstək İctimai Birliyinin sədri Şəhid polkovnik-leytenant Raquf Orucovun həyat yoldaşı Sevinc Alızadə, tarix üzrə fəlsəfə  doktoru Firdovsiyyə Əhmədova,  Milli Qəhrəman Şirin Mirzəyevin həyat yoldaşı, millət vəkili Flora Qasımova, Millət vəkili Tahir Mirkişili, professor Anar İsgəndərli, Parlament Jurnalistlər Birliyinin sədri Elşad Eyvazlı, Qarabağ qazisi Rey Kərimoğlu, “Zəfər” Şəhid Ailələrinə Dəstək İctimai Birliyinin üzvləri, ictimaiyyət nümayəndələri, QHT rəhbərləri, şəhid ailələrinin üzvləri, qazilər və KİV nümayəndələri iştirak ediblər.

         Tədbir universitet tələbələrinin müzakirələrdə çıxışları ilə yekunlaşıb.

        Sosial layihə “Azedu.az” saytının informasiya dəstəyi ilə həyata keçirilir.