Şəhid övladları Şuşada ilk respublika uşaq tədbirində -FOTO

01 iyun 2022 10:59:13

İyunun 1-də Şuşada məktəblilər arasında təşkil olunmuş "Könlüm keçir Qarabağdan" adlı respublika incəsənət festival-müsabiqəsinin yekun konsert proqramı keçirilir.

Təhsil Nazirliyindən verilən məlumata görə, uşaqların Beynəlxalq Müdafiəsi gününə təsadüf edən festival-müsabiqənin yekun tədbiri Şuşa şəhərinin işğaldan azad edilməsindən sonra orada keçirilən ilk respublika uşaq tədbiridir.

Tədbir Təhsil Nazirliyinin təşkilatçılığı, Mədəniyyət Nazirliyinin və Şuşa Dövlət Qoruğu İdarəsinin tərəfdaşlığı ilə Şuşa Real Məktəbinin qarşısında təşkil olunub.

Tədbirdə Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, təhsil naziri Emin Əmrullayev, Ailə, Qadın və Uşaq Problemləri üzrə Dövlət Komitəsinin sədri Bahar Muradova, mədəniyyət nazirinin müavini Sevda Məmmədəliyeva və digər dövlət rəsmiləri, tanınmış mədəniyyət və incəsənət xadimləri, şəhid övladları, festival müsabiqənin qalibləri iştirak edib.

Qeyd edək ki, "Zəfər" Şəhid Ailələrinə Dəstək İctimai Birliyinin təşkilatçılığı və Təhsil Nazirliyinin dəstəyi ilə tədbirdə Vətən müharibəsi zamanı Şuşanın azadlığı uğrunda qəhrəmancasına şəhadətə ucalan şəhidlərimizin övladları da iştirak edir.