DİA-da şəhidlərimizə həsr edilən “8 Qardaşın Həyat Hekayəsi” adlı tədbir keçirilib

29 fevral 2020 14:02:42

28.02.2020 tarixində Dövlət İdarəçilik Akademiyasının Akt zalında Vətənpərvərlik Klubu təşkilatçılığı ilə 1997-ci ilin aprelində Ermənistan ordusunun silahlı birləşmələri ilə qeyri-bərabər döyüşdə şəhid olan şəhidlərimizə həsr edilmiş “8 Qardaşın Həyat Hekayəsi” adlı tədbir keçirilib.

Zəfər.Az bilriri ki, tədbirdə Tədris işləri üzrə prorektor Əlikram Abdullayev, Siyasi İdarəetmə fakültəsi dekanı, siyasi elmlər üzrə fəlsəfə doktoru Elçin Əhmədov, Tarixçi alim, Tarix kafedrasının müdiri Firdovsiyyə Əhmədova, əfsanəvi kəşfiyyatçı Murov qartalı Raqif Orucovun həyat yoldaşı, “Zəfər" Şəhid Ailələrinə Dəstək İctimai Birliyinin sədri  Sevinc Alızadə, tanınmış jurnalist, Qarabağ qazisi Rey Kərimoğlu, 1997-ci ildə həmin hadisələrdə əsir düşmüş əsgərimiz Aqil Əhmədov, Şəhid Dinar Mustafayevin bacısı, akademiyanın İnformasiya-kommunikasiya texnologiyaları kafedrası müəlliməsi Şəfəq Mustafayeva, Milli Mədəniyyətin təbliği ictimai birliyinin sədri, həmin şəhidlərə həsr edilmiş “Əbədi Yaşar” kitabının müəllifi Jalə Cəfərova və şəhidlərin ailələri iştirak etmiş və öz fikirlərini bildiriblər.

Əfsanəvi kəşfiyyatçı Murov qartalı Raqif Orucovun həyat yoldaşı, “Zəfər" Şəhid Ailələrinə Dəstək İctimai Birliyinin sədri Sevinc Alızadə çıxışı zamanı gənclər arasında milli vətənpərvərlik hissinin aşılanması və Azərbaycanın bütövlüyü uğrunda şəhidlik zirvəsinə ucalan şəhidlərimizin qəhrəmanlıqıarından danışıb. O bildirib ki, elimizin qəhrəman oğullarının unudulmaması və unutdurulmaması yolunda hərkəsin üzərinə düşəni etməsi və əlini daşın altına qoyması gərəkdir.

Tədbir zamanı şəhidlərə həsr edilmiş “8 oğul istərəm” adlı film təqdim edilib. Sonda qonaqlarla xatirə şəkli çəkdirilib.