SHXÇDX-nin 8-ci ildönümü qeyd olundu - FOTO - VİDEO

13 fevral 2020 16:50:53

Bu gün Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) yaradılmasının 8-ci ili tamam olur.

Səfərbərlik və Hərbi Xidmətə Çağırış üzrə Dövlət Xidmətin aparatında qurumun yaradılmasının 8 illiyinə həsr olunan təntənəli mərasim keçirilib.

Dövlət Himninin səsləndirilməsi ilə başlayan tədbirdə Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov qurumun yaranması, inkişafı və fəaliyyəti barədə geniş məruzə ilə çıxış edib.

Tədbirdə Xidmətin bir qrup hərbi qulluqçusunun təltif edilməsi haqqında SHXÇDX rəisinin imzaladığı əmrlər elan olunduqdan sonra xidmətdə fərqlənənlərə dövlət təltifləri, həmçinin hərbi rütbələr və fəxri fərmanlar təqdim olunub.

Tədbirdə əfsanəvi kəşfiyyatçı, Murov Qartalı şəhid polkovnik-leytenant Raquf Orucovun xanımı, "Zəfər" Şəhid Ailələrinə Dəstək İctimai Birliyinin sədri Sevinc xanım Alızadə də iştirak edib. Sevinc xanım Alızadə cəmiyyət arasında şəhidlərimizin tanıdılmasında və vətənpərvərliyin təbliği sahəsində gördüyü işlərə görə Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov tərəfindən təltif edilib.

Azərbaycan Gənclər Fondunun icraçı direktoru Fərid Cəfərov, Milli Qəhrəman Vahid Quliyev və vətənpərvərlik mahnılarının ifaçısı Şəmistan Əlizamanlı “Hərbi vətənpərvərlik tərbiyəsində xidmətlərə görə” Azərbaycan Respublikasının medalı ilə təltif ediliblər.